អ្នកស្ថិតនៅទីនេះ៖ ទំព័រដើម / បន្តទិដ្ឋាការរបស់ខ្ញុំជាថ្មី

ការសុំទិដ្ឋាការសាឡើងវិញ

លើទំព័រនេះ


ទិដ្ឋភាពទូទៅ៖

ប្រសិនបើអ្នកដាក់ពាក្យសុំទិដ្ឋាការប្រភេទ B1/B2, ប្រភេទ F, ប្រភេទ M ឬប្រភេទ J សាជាថ្មី អ្នកប្រហែលជាអាច​ប្រើប្រព័ន្ធ​លើកលែងការសម្ភាស ឬប្រព័ន្ធ Interview Waiver (ដោយមិនសម្ភាស)​ បានហើយអាចយកពាក្យ​សុំទិដ្ឋាការមកដាក់នៅ​ការិយាល័យ​កុងស៊ុល​នៃស្ថានទូតសហរដ្ឋអាមេរិកនៅទីក្រុងភ្នំពេញនៅរៀងរាល់ថ្ងៃពុធតិ៍ចាប់ពីម៉ោង ១-៣​​ រសៀល ប្រសិនបើអ្នកមាន​​​លក្ខណៈសម្បត្តិសមស្របតាមល័ក្ខខ័ណ្ឌតម្រូវដូចខាងក្រោម។

លក្ខណៈសម្យត្តិ៖

  • ប្រសិនបើអ្នកដាក់ពាក្យសុំទិដ្ឋាការប្រភេទ B1/B2, ប្រភេទ F, ប្រភេទ M ឬប្រភេទ J សាជាថ្មី ហើយទិដ្ឋាការពីមុនរបស់អ្នកប្រភេទដូចគ្នានេះនៅមានសុពលភាពនៅឡើយ ឬក៏ទើបតែផុតសុពលភាពក្នុងរយៈពេល១២ខែ (មួយឆ្នាំ) កន្លងមកនេះ។
  • អ្នកមិនធ្លាប់បានគេបដិសេធទិដ្ឋាការប្រភេទដូចគ្នានេះកាលពីឆ្នាំមុន។
  • អ្នកកំពុងតែមានវត្ថមាននៅក្នុងប្រទេសកម្ពុជា។
  • ឈ្មោះ ថ្ងៃខែឆ្នាំកំណើត និងសញ្ញាតិនៅក្នុងលិខិតឆ្លងដែនអ្នកដូចគ្នានឹងទិដ្ឋាការពីមុនរបស់អ្នក ហើយអ្នកកំពុងតែដាក់ពាក្យសុំទិដ្ឋាការប្រភេទដូចគ្នានឹងទិដ្ឋាការពីមុនដែលនៅមានសុពលភាព ឬទិដ្ឋាការដែលអ្នកធ្លាប់ទទួលបាននាពេលកន្លងមក។

  -  សម្រាប់ការដាក់ពាក្យសុំទិដ្ឋាការប្រភេទ F និងប្រភេទ M សាជាថ្មី បេក្ខជនត្រូវតែ៖

(ក)  ធ្វើដំណើរទៅបន្តការសិក្សាក្នុងកម្មវិធីសិក្សាដដែល ទោះបីជានៅវិទ្យាស្ថានផ្សេងខុសពីមុនក៏ដោយ ឬ
(ខ)  ទៅសិក្សានៅវិទ្យាស្ថានដដែល ប៉ុន្តែក្នុងកម្មវិធីសិក្សាខុសពីមុន។ 

  -  សម្រាប់ការដាក់ពាក្យសុំទិដ្ឋាការប្រភេទ J សាជាថ្មី ត្រូវមានលេខសម្គាល់ SEVIS ដូចគ្នានឹងទម្រង់ DS-2019 កាលពីមុន។

របៀបដាក់ពាក្យសុំ៖

ជំហានទី 1:

បំពេញពាក្យសុំទិដ្ឋាការទម្រង់ DS-160។ សូមអោយប្រាកដថាអ្នកប្រើប្រាស់បារកូដនៃទម្រង់ DS-160 ថ្មីដែលទើបតែបានបំពេញ។ 

ជំហានទី 2:

បង់ប្រាក់ថ្លៃដាក់ពាក្យសុំទិដ្ឋាការ។ 

ជំហានទី 3:

សូមចូលទៅ Profile របស់អ្នកដោយប្រើឈ្មោះ និងព័ត៌មានសម្ងាត់ (Username and Password) រួមទាំងព័ត៌មានខាងក្រោម ហើយបន្ទាប់មកសូមព្រីនចេញនូវទំព័របញ្ជាក់សម្រាប់ប្រព័ន្ធ Drop-Off។

  • លេខលិខិតឆ្លងដែនរបស់អ្នក។
  • លេខវិក្កយបត្របង់ប្រាក់ថ្លៃដាក់ពាក្យសុំទិដ្ឋាការ (សូមចុចទីនេះប្រសិនបើត្រូវការរកលេខវិក្កយបត្រ)។
  • លេខបារកូដដប់​ (១០) ខ្ទង់នៃទំព័របញ្ជាក់របស់ពាក្យសុំទិដ្ឋាការទម្រង់​ DS-160។

បេក្ខជនចាំបាច់ត្រូវព្រីនចេញនូវទំព័របញ្ជាក់សម្រាប់ប្រព័ន្ធ Interview Waiver (Interview Waiver Confirmation Page) រួចគូសបំពេញក្នុង ប្រអប់នៃបញ្ជីរាយឯកសារ។ បេក្ខជនណាដែលមិនមានទំព័របញ្ជាក់នេះ អាចប្រឈមមុខនឹងការយឺតយូរ​ដល់ដំណើរ​នៃពាក្យសុំ​ទិដ្ឋាការ​របស់ពួកគេ។

ឯកសារចាំបាច់ដែលត្រូវយកទៅដាក់នៅការិយាល័យកុងស៊ុល

  • លិខិតឆ្លងដែនដែលអាចធ្វើដំណើរទៅសហរដ្ឋអាមេរិកបាន ហើយមានសុពលភាពនៅសល់យ៉ាងតិច​ប្រាំមួយខែក្រោយពី​រយៈ​ពេលដែលអ្នកចង់ទៅស្នាក់នៅសហរដ្ឋអាមេរិក។
  • ទិដ្ឋាការសហរដ្ឋអាមេរិកដែលអ្នកធ្លាប់បានទទួលចុងក្រោយគេបង្អស់។
  • ទំព័របញ្ជាក់របស់ទម្រង់ DS-160 ដែលមានបារកូដ។
  • រូបថតថ្មីចំនួន១សន្លឹក (ល័ក្ខខ័ណ្ឌតម្រូវរូបថតទីនេះ)។
  • វិក្កយបត្របង់ប្រាក់ថ្លៃដាក់ពាក្យសុំទិដ្ឋាការពីធនាគារ អេស៊ីលីដា (ACLEDA Bank)។
  • ទំព័របញ្ជាក់សម្រាប់ប្រព័ន្ធ Interview Waiver។

សម្រាប់បេក្ខជនជាសិស្ស និស្សិត ផ្នែកបណ្តុះបណ្តាលជំនាញវិជ្ជាជីវៈ និងបេក្ខជនផ្លាស់ប្តូរទស្សនៈកិច្ចសិក្សា

  • ច្បាប់ដើមរបស់ទម្រង់ I-20 ​ឬ ទម្រង់ DS-2019។
  • សម្រង់ពិន្ទុផ្លូវការរបស់សិស្ស និស្សិត (Official transcripts)។  

ព័ត៌មានសំខាន់ៗ

  • សូមអានការណែនាំសម្រាប់បំពេញទម្រង់ DS-160 ដោយយកចិត្តទុកដាក់។ សូមបំពេញព័ត៌មានទាំងអស់អោយ​បាន​ពេញលេញ ហើយសូមអោយប្រាកដថាព័ត៌មានទាំងនោះជាព័ត៌មានពិតប្រាកដត្រឹមត្រូវ។ គេអាចនឹងបដិសេធពាក្យ​សុំ​ទិដ្ឋាការ​របស់អ្នក ប្រសិនបើអ្នកបំពេញពាក្យសុំទិដ្ឋាការមិនបានពេញលេញ និងត្រឹមត្រូវទេនោះ។
  • ប្រព័ន្ធ Drop-Off នេះ មិនអាចធានាថានឹងចេញទិដ្ឋាការជូនបាននោះទេ។
  • ក្នុងករណីទិដ្ឋាការមួយចំនួន បេក្ខជនដែលដាក់ពាក្យសុំទិដ្ឋាការសាជាថ្មីតាមប្រព័ន្ធលើកលែងការសម្ភាស ប្រព័ន្ធ Drop-Off នេះអាចនឹងត្រូវគេអញ្ជើញអោយមកសម្ភាសន៍នៅការិយាល័យកុងស៊ុល។ ឧទាហរណ៍ដូចជា​ពាក្យសុំទិដ្ឋាការណាដែលបំពេញពត៌មានមិនបានពេញលេញ ឬផ្តល់ពត៌មានដែលមិនត្រឹមត្រូវ ឬប្រើប្រាស់រូបថតចាស់ជាដើម។ ការិយាល័យកុងស៊ុលនឹងផ្តល់ព័ត៌មានទៅអ្នកប្រសិនបើត្រូវការឯកសារអ្វីបន្ថែមទៀត ឬក៏ត្រូវអញ្ជើញអ្នកអោយ​មកសម្ភាសន៍។
  • ការសុំទិដ្ឋាការសាជាថ្មីតាមប្រព័ន្ធលើកលែងការសម្ភាស ឬតាមប្រព័ន្ធ Drop-Off នេះអាចចំណាយពេល​ប្រហែល​ជា៧ថ្ងៃ (ថ្ងៃធ្វើការ)។ ប្រសិនបើការធ្វើដំណើររបស់អ្នកជាលក្ខណៈប្រញាប់ អ្នកត្រូវណាត់ពេលវេលាមកសម្ភាសន៍​ដោយផ្ទាល់វិញ។